Conseil départemental des Bouches-du-Rhône

MIETERRANO, PROUMIERO DESTINACIEN TOURISTICO AU MOUNDE…

Notre rubrique dédiée à la langue provençale met en avant, en dialecte rhodanien, quelques-uns des livres incontournables de la cuisine provençale ! Une belle occasion de rappeler en cette année de la gastronomie que les recettes ne manquent pas pour continuer de faire de la Provence un paradis " où l’on se régale le palais ”...

MIETERRANO, PROUMIERO DESTINACIEN TOURISTICO AU MOUNDE…

UNO MAR QUE FA PANTAIA EMAI TRAVAIA…

Emé soun climat tempera tout de long de l’annado, sei plajo, sei païsàgi espetaclous e soun patrimòni culturau sènso parié, la Mare Nostrum, nouesto mar, dei Rouman a tout pèr atriva lei vouiajaire, acò despui qu’espeliguè lou tourisme tre la fin dóu siècle 18èime sus la coustiero prouvençalo e sus la riviera italiano ! Soun aigo bluio a ja fa pantaia lei pintre (Courbet, Van Gogh, Matisse...), leis escrivan (Dumas, Lamartine, Mistral...), tout autant que lei touristo d’ièr, de vui … emai de deman.

En 2018, la grando bluio acuiè quàsi 350 milien de vesitaire, siegue 30 % de toui lei touristo internaciounalo qu’arribon dins lou mounde entié. Uno trevanço que va creissènt despui mai de 40 an em’un trin que s’abrivo que mai. Segound d’estimacien de l’Ourganisacien moundialo dóu tourisme (OMT), alor qu’en 1978 Mieterrano coumtavo 58 milien d’arribado internaciounalo, en 2030, soun toutun agantara lei 500 milien. Aquelo ativeta fa travaia foueço gènt dins la regien : segound un raport publica en 2015 pèr lou Counsèu moundiau dóu tourisme e dei vouiàgi (WTTC), lou tourisme recampo aperaqui 12 % de l’emplé en Mieterrano e lou seitour fa 11,5 % dóu Proudu Interiour Brut (PIB) dóu gros relàrgui.

MAI UNO MAR QUE FAU APARA…

Ai las ! Leis ativeta ligado au tourisme, majamen de masso (crousiero e ativeta balneàri), vènon agrava que mai un envirounamen deja trantaiant, e mume tant l’avali dins uno pountannado que lou climat vèn fada : urbanisacien de la touto pèr respouendre ei besoun creissènt dei poupulacien (oustau, equipamen, trasport, ativeta endustrialou-pourtuàri…), amermamen deis espàci pèr l’agriculturo e lei fourèst, lou subre-counsume d’aigo bevablo e d’eleitricita (climatisacien, caufàgi), esplecho sóuvajo de l’animalun e dóu flourun ja bèn entrepacha pèr l’augo caulerpa taxifolia qu’es mai resistènto en mitan mieterran qu’en mitan troupicau d’ounte vèn (fuguè aducho en 1983 pèr lou Musèu ouceanougrafi dóu Mounègue que fasié la vuidanço de sei bacin), poulucien marino e d’aigo douço de touto meno que s’apren eis aigo embrutido rejitado emai ei bourdihié sóuvàgi d’uno moulounado de bourdiho soulido qu’es pas de crèire…

Mai, vouguessian que nouesto mar Mediterragno countunièsse de nous fa viéure emai pantaia, nous fau l’apara sènso plus ges de relàmbi coumo nouesto planèto tout court. Li a fouèço gènt qu’à soun nivèu (proufessiounau, poudé publi, counsumaire…) an pres counsciènci d’aquéleis enjue envirounamentau e que si boulègon…

Pamens, emai siguèsse jamai tròup tard pèr bèn faire, cadun saup qu’em’un proublèmo parié, faudrié que si bouleguessian tóutis ensèn soulide pèr trouba uno soulucien duradisso… en gardant coumo amiro de leissa lei generacien avenidouiro dorbi enca longtèms aquelo fenèstro qu’es Prouvènço pauvado sus 835 km de tra de coustiero e prouficha d’uno mar propro emai vivènto !

Jan-Miquèu Turc
Proufessour certifica de lingo prouvençalo
Majourau dóu Felibrige

 

VA SABIAS ACÒ ? LA FFESSM ES À MARSIHO ! (DIALÈITE MARITIME)

La Federacien Franceso d’Estùdi e d’Esport Souto-Marin a soun sèti naciounau es toujour à Marsiho e dounc en Prouvènço ! Belèu bèn qu’es sa coustiero touto poulido que s’esperlongo sus sei 115 km (835 km pèr la regien) que faguè toumba l’archimbello en la favour de la vilo Marsiho ? Vo bessai d’agué coumta dins seis abitant d’apneïsto famous coumo Jaque Mayol (1927-2001) ? Basto ! Que que sigue la bouono rasoun, la FFESSM es aquito e pòu dire : “Li sian bèn !” Aquelo federacien neissè en 1955, en fènt qu’uno souleto de douei federacien foundado en 1948, la Federacien dei Soucieta de Pesco à la nado e d’Estùdi Souto-Marino emai la Federacien deis Ativeta Souto- Marino. Vui, recampo la màji-part deis escolo de nado-souto-aigo de Franço. Mai enca, es sòci foundadou de la Counfederacien Moundialo deis Ativeta Subaquatico (CMAS). Zóu, bagna pèr bagna, anen ! E passen lou proumié nivèu d’aquest esport d’un autre mounde, mai silencious !

www.ffessm.fr

CARTOUNETO D’IDENTITA DE LA MEDITERRAGNO (DIALÈITE MARITIME)

Etimoulougié : Medius terrae, mar au mitan dei terro
Superficìo : 2 510 000 km2 (siegue 5 fes la Franço), 1 % de l’oucean moundiau
Bacin : lou bacin levantés e lou bacin pounentés, dessepara pèr un mountagnàgi souto-marin que s’esperlongo entre Sicilo e Tunisìo
Founsour mejano : 1 500 m
Founsour massimalo : 5 121 m (founsau de Matapan au miejour estrème de la Grèço)
Marèio : 30 cm en mouieno, partènt dóu zèro foundamentau baia pèr lou maregrafe de Marsiho
Voulume d’aigo : 3 700 000 km3, siegue un cube de 1 900 km de coustat
Salineta : 38 ‰ (mai que l’Atlanti à 33 ‰ e mèns que la mar Mouarto à 270 ‰)
Tèms pèr renouvela leis aigo : 90 an
Coustiero : 46 000 km de couesto, que quàsi la mita rapresènto l’entour deis isclo
Flùvi : 69 que Rose n’en fa partido e nouèstei flùvi coustié (Var…)
Animalun e flourun : 7 500 espèci animalo e 1 000 espèci vegetalo

DÉCOUVREZ LES ARTICLES PRÉCÉDENTS EN PROVENÇAL