Jue paralimpi “pèr l’esperit, lou couars, l’amo” (Jeux paralympiques : "Pour l'esprit, le courage, l'âme")
Texte en Provençal suivi de sa traduction française
Lei darrié Jue paralimpi d’ivèr si debanèron en mars passa à Pyeongchang, en Courèio dóu Sud. Bouonodi sei 12 atlèto, la Franço li prenguè la 4èimo plaço en averant 20 medaio que 7 èron d’or, après leis USA, leis Atlèto paralimpi nèutre e lou Canada. Ourganisa pèr lou CIP (Coumitat Internaciounau Paralimpi), lei Jue paralimpi si fan toui lei quatre an en seguido dei Jues oulimpi, dins lou mume endré. Aquéu rendès-vous internaciounau dei gros pouerge eis atlèto entrepacha la bello óucasien de si subre-passa dins d’esprovo handisport coumo dien (entrepachesport se voulès) en fènt de grand fa espourtiéu coumparadis à-n-aquélei deis atlèto oulimpi.
E pèr que la coumpeticien siegue justo, vous recampon lei participant dins talo vo talo categourìo segound que soun empache es mai fisi vo mentau : tetraplegi e paraplegi, sequèlo néuroulougico assimilablo, amputa e assimila, endeca moutur, cerebrau, foueço entrepacha (mioupate, fautuei eleitri), noun-vesènt e mauvesènt, vo entrepacha mentau. En atletisme pèr eisèmple, vous ourganison d’esprovo especifico de courso pèr leis avugle, pèr lei mauvesènt, pèr lei descamba que courron em’uno proutèsi e de courso emé lou fautuei courredis. De soun coustat, lei sourd e mal-entendènt an sei Jue à-n-élei, lei Deaflympics, Jues oulimpi dei sourd.
Alor mi dirés proubable : “Tron de Diéu ! Mai qu nous fau remarcia pèr tout acò ?”. Ebè, figuras-vous qu’aquéstou noble proujèt s’aprene à-nun medecin néuroulogue, Sir Ludwig Guttmann, de l’espitau de Stoke Mandeville, dins lou coumtat de Buckinghamshire, pròchi Loundre.
Aquéu-d’aqui aguè la bravo idèio d’ourganisa tre 1948 sus lou terrende l’espitau, lei proumié Jue moundiau de cadiero-courredisso e deis amputa (en anglés es World Wheelchair and Amputee Games).
Counouissu pus tard souto lou noum de Jue de Stoke Mandeville, aquélei jue avien pèr toco majo de redouna sa plaço ei vitimo emai eis encian coumbatènt de la Segoundo Guerro moundialo vengu paraplegi, en lei fènt pratica un esport. Lou tir à l’arc fuguè la proumiero emai souleto esprovo que li prenguèron sa part doues equipo d’encian coumbatènt.
Toucant lou noum, “paralimpi” èro à la debuto uno coumbinesoun de “paraplegi” e “oulimpi”. Prenguè puei un sèns nòu emé “para” (prefisse gregau que vòu dire “à coustat de” vo “paralèle”) e de la terminesoun “limpi” dei Jues oulimpi. Vaqui perqué lei Jue paralimpi soun counsidera vuei coumo soulidàri dei Jues oulimpi. Mai fauguè espera 1960 e lei IXe jue de Stoke-Mandeville à Roumo pèr que pousquessian parla clar dei proumié Jue paralimpi d’estiéu e 1976 pèr lei proumié jue d’ivèr à Örnsköldsvik en Suèdo.
Enfin, despuei 1980 e lei Jue d’Arnhem, leis atlèto entrepacha pèr uno paralisìo cerebralo li pouedon tambèn s’endraia e despuei 1988, à Seoul, lei Jues oulimpi e lei Jue paralimpi planton un tèms caviho dins la mumo vilo. Tout acò di, e sènso fa mai d’alòngui, dounen-si rendès-vous en 2020 à Tokyo que si li debanaran lei Jue paralimpi d’estiéu emai en 2024 à Marsiho pèr segui leis esprovo de velo despuei la Cournisso Kennedy !
Jan-Miquèu Turc
Proufessour certifica de lingo prouvençalo
Majourau dóu Felibrige
Va sabias acò ?
Maugrat que lei Jue paralimpi reprengon la màji part dei simbole oulimpi (ceremounié de duberturo e d’acabado, flamo oulimpico, pouerto-bouonur), lou lougò e la deviso paralimpico, au contre, li soun propro. Verai, lou lougò de vuei fa vèire tres agitos (dóu latin «boulègui»), que dirias de viergulo clinado sus d’un founs blanc aguènt chascuno sa coulour : lou verd, lou rouge e lou blu. Aquéstei coulour soun lei que si vien lou mai sus lei bandiero. Trei simbole que nous remandon ei trei partido de l’èsse uman e que foundon la deviso paralimpico : “L’esperit, lou couars, l’amo.”
Un handisport, qu'es acò ?
Un handisport coumo dien - vo entrepachesport se vous agrado miés - es un esport que sei règlo fuguèron facho pèr que lei gènt entrepacha dóu couars coumo dei sèn pousquèsson lou pratica. Si parlo mai d’esport asata quouro l’esport si fa pèr aquélei que soun empache es mentau. Leis entrepachesport seguisson à la grosso lou biais deis esport que counouissèn ja. Pamens, l’a d’ùnei que fuguèron mounta just e just pèr leis entrepacha. An pas soun parié co deis espourtiéu valide.